“Залатая горка” і рабаванне кніжнага склада.
Зборнік гістарычных дэтэктываў Кастуся Тарасава “Залатая горка” пабачыў свет ў 1998 годзе ў кніжнай серыі “Начны ганец”. Кніга складалася з трох аповесцяў на рускай мове: “Золотая горка”, “Чёрный шлях” і “Тропа Каина”. У першым творы падзеі адбываюцца на пачатку ХХ ст. у Мінску, а Залатая горка – гэта адзін з раёнаў горада, пра які сёння нагадвае аднайменная вуліца. Героямі аповесці сталі эсэры, жыццё якіх поўнае небяспекі. Аўтар пагружае чытача ў тагачасны Мінск, асабліва цікава чытаць гэты твор будзе мінчанам, бо падзеі адбываюцца па мінскіх адрасах, а Кастусь Тарасаў дае прывязку да сённяшніх лакацый. Пісьменнік сам нейкі час жыў у раёне Залатой горкі. Аповесць “Чёрный шлях” пераносіць чытача ў пачатак ХVІ ст. у часы княжання вялікага князя Аляксандра, калі наваколлі Ашмян тэрарызуе банда невядомых. У “Тропе Каина” аўтар апавядае пра падзеі вайны сярэдзіны ХVІІ ст., якая атрымала назву “патоп”. Апошняя аповесць пазней была перапісана аўтарам і выйшла пад новай назвай “На вайне”.
"Залатая горка (справа зверху) з боку Полацкіх валок"
Кніга выйшла немалым і па тым часе накладам 10000 асобнікаў у выдавецтве “Лекцыя”. Выдавец і аўтар у адной асобе быў удзячны любому прадпрымальніку і кніжнай краме, якія бралі на продаж гэтую кнігу. Адна ўпакоўка аказалася ў руках у прадпрымальніка з Салігорска. Для сваіх патрэб пад кніжны склад ён здымаў прыватную кватэру. Аднойчы ён прыехаў за кнігамі і пабачыў, што ў кватэру патрапілі злодзеі. Разам з іншымі кнігамі яны скралі тую самую ўпакоўку “Залатой горкі”. Прадпрымальнік браў кнігі на рэалізацыю і распавёў Кастусю Тарасаву пра сваю праблему, бо за тавар трэба было ж разлічвацца. Калі аўтар даведаўся пра абставіны здарэння, то сказаў, што плаціць нічога не трэба.
Ну а што сталася са злодзеямі і скрадзенымі кнігамі? За некалькі гадзін злодзеі здолелі распрадаць гэтыя кнігі на мясцовым рынку. Прадавалі за вельмі малыя грошы, каб назбіраць на выпіўку на бліжэйшыя некалькі дзён. Калі пабачылі, што справа пайшла добра, вярнуліся ў абрабаваную кватэру ізноў. Але там іх ужо чакаў прадпрымальнік. Неўзабаве сябар прадпрымальніка прывёў міліцыю, што і прадвызначыла сумны лёс аднаго са злодзеяў, а яго паплечніку неяк удалося адкруціцца.
